วันอังคารที่ 19 เมษายน พ.ศ. 2565

โฮงฮอง - ผะหยาบ่าวทิปี2022

โฮงฮอง

บ่าวทิ ยางชุมน้อย
อังคาร.19.04.2022



ผู้ฟังเอย คึดคือบ่าวทิบ่นอ
ฝนเมษามาไล่ฮ้อน ฮวยหลุ่มนาเลิง โฮ่งฮ่องเห็นเฟียงฟู ก่ายกันเป็นแพนั่น แนมไกลไกลคือผืนน้ำบึงหนองสีบาดหนึ่ง คึดฮอดเดคราวแต่น้อย ได้ลอยเล่นม่วนใจ

อีกบ่นานสิหลายแท้ เทิงคันแทหญ้าสิป่ง เขียวสะออนหวานลิ้น ควายสิได้เที่ยวกิน ตั๊กแตนแตกวึ่นวึ่น คนท่งมีอาหาร สานไม้แตะบ่วงคุบเอา ใส่ข่องถุงแพรมนน้อย เด็กเลี้ยงควายสิแข่งเอื้อน เพลงตั๊กแตนฮ้องแอ่ว อีแม่ก่ำม่มเอย บินตกอยู่หม่องหนี่หรือไปลี้อยู่ไส อีแม่มอนแม่ฝ้ายสีลายเขียวอีง่าวใหญ่ อีแม่แดงบินตกไกล แล่นคุบตีกะบ่ได้ ย่อนแฮงล้าหล่อยขา ฮอดนาเพิ่นฮุดแล้ว ก้อนขี้ไถแล่นบ่ง่าย ฝนพวมเซา ขี้ตมติดอ้อนต้อนตีนน้อยน้อย กะหนักอึ้งบ่หนอย งานนายังบ่ฮุดนั่น กะไคแนพอทำเนา ลมพัดป่าหญ้านกเขา กะว่างามตามพื้น ฟังเพลงลำพรศักดิ์ฮ่อง เอิ้นหานางน้องพี่ คืนบ้านเฮาเถาะหล่า เมือบ้านถิ่นสถาน ต่อด้วยเอิ้นเอาน้องคืนนาคืนท่ง เสียงเฉลิมพลเพิ่นอ้อนสะออนเด้ ม่วนหลาย...

ผู้ฟังเอย
ไผผู้เคยเลิงเล่นฝนเมษาโฮ่งฮ่อง คือบ่าวทิว่านี่ มีบ้อหรือเปล่าแปน จั่งใด๋กะเม้นต์มาจาบอกบ้าง บ่าวทิลอถ่าเจ่า ยุเดอท่านคู่ซุคน บ่าวทิรอถ่าเจ่า ยุเดอท่านคู่ซุคน.




ไม่มีความคิดเห็น:

แสดงความคิดเห็น

บทเพลง คึดได้ไปเป็น l บ่าวทิ ยางชุมน้อย

ว่าด้วยที่มาของบทเพลง "คึดได้ไปเป็น" •เกิดมาน้อยเท่าใหญ่ ฟังเพลงบอกรักหรือแสดงบุญคุณแม่พ่อ ก็มีแต่เพลงแยก •มีเพลงแม่ อย่าง ค่าน้ำน...