วันพฤหัสบดีที่ 18 มีนาคม พ.ศ. 2564

ฮอยย่างทางยาว

ทุกความหดหู่
คือดอกกะยอมหล่นลา
แต่ยังบํจบสิ้น
ปีใหม่จูมจีใหม่
ผลิบานหอมใหม่
ตราบต้นยังทรงตัว
ตราบรากยังดิ่งดูดดื่ม
ตราบตุ่มตายังแตกยอดถอดใบ
ตราบคนนายังแหงนหน้าสะออนพั้วพวงบานหอม
ตราบตอเฟียงยังฮักกลีบหล่นลาก้านมาซบอ้อยอิ่ง
ตราบสายลมเช้าเคล้าหมอกจางๆ ยังรำเพยเชื่อยฉิว
ตราบฮอยยิ้มยังแย้มในอกผู่ข่า

เหมือนมื้ออื่นเซ่า
เหมื่อนเดือนหน่า
ปีใหม่ๆ
ซอมดูถ่อน
ใจเฮายังหม่วนซื่น
ใจเฮายังห่าว
ยังห่วง...

| ทางหอม |
19.03.2564





วันอังคารที่ 16 มีนาคม พ.ศ. 2564

คุณค่ารักนั้น

ก้าวลงนา
เช้ามีนาหมอกขัวนัว
ยอดหญ้าปนใบลูกข้าวพราวน้ำค้าง
คึดฮอดเด็กเลี้ยงควาย
คำสาปของการพัฒนา
ไล่ต้อนจนมุม
หาที่ทางใดเล่า
หามุมมองใดกัน
หาของขวัญใดทัดเทียม
วันเวลาอวลกลิ่นกลีบขะยอมแห้ง
ปนกลิ่นดินนาฟ้าแจ้งแพงดอกหว้าใหม่ๆ
รำลึกเพียงรางๆ
รำพันเพียงแผ่วๆ
รำพึงเสียงพระถั่งโปงจากวัดของหมู่บ้านฟากท่ง
ลำเลียงภาพทยอย
ใครกันนั่งบนหลังควายหนุ่ม
ขับลำทำนองหอมบั่วกวยแก่งดอกใหม่ๆ
ต่อด้วยกลอนลำล่องนาห้วยครก
ไหลลงแม่น้ำมูนฟากทางใต้
เอื่อยอ้อยอิ่งสู่แม่ของบ่อนนั่นเด๊
บ่รู้คืนวัน
บ่รู้มื้อจืดจาง...

|ทางหอม

วันจันทร์ที่ 15 มีนาคม พ.ศ. 2564

รักเลยเพล

ไปเพลมาแล้ว
ย่ากะล้างปิ่นโตคว่ำไว้
สะแนนไม้ไผ่อาบแดด
สะเลเตข้างโอ่งมังกรซอมซิง
ไก่ในป่ามอนขันเล่น
นกเทิงกกเฟียงส่งข่าว
กะปอมกำพร้าเทิงกกมี่คะนิงหวน
กับแก้ฝาเล่าเข่าใต้ฮ่มขามทวนคำ
ขี้เกี้ยมเอียงคอส่องใกล้ด้งม่อนพิงเสาเฮียนหูก

ลีลาชีวิต
ดำเนินตามทาง
ย่านั่งคุยกับกะต่าหมาก
ครกน้อยรับแรงกระแทกของสากเหล็กน๊อต
คุ้ยขึ้นมาเคี้ยว
เก็บของเข้าต่า

มื้อนี่
ต้องไปตัดใบตองตาก
เอาไว่ห่อข้างต้มข้าวหนม

ทางหอม | 16.03.2564





วันเสาร์ที่ 13 มีนาคม พ.ศ. 2564

รักแท้จริง 1

คล้ายสายลมเดือนสี่คล้อย
เล่นล้อใบสะแบงเก่า
ใต้ร่มเงากิ่งก้านแม่
ใบรุ่นใหม่เริ่มร่ายมนต์

เหมือนแสงเช้าเหงาๆ
ส่องต้องใบสะแบงหมอง
ใบเว้าแหว่งตรงนั้นที
ใบขาดหวิ่นตรงนี้ที

ราวขณะใบสะแบงเศร้าน้อยๆ มนๆ
ปลิวขึ้นลงตามแรงลมร้อน
ปะทะป่าตอซังลูกเขียวรวงใหม่
ไหวสนทนากับดอกหว้ารอฝน

นานมาแล้วดกดื่น
เร็วๆ นี้ พร่างพราย
และรอวันพรุ่งเปล่งประกาย

•ทางหอม 
อา.14.04.2564



วันพุธที่ 10 มีนาคม พ.ศ. 2564

เบื้องหลัง ที่ทำให้วันคืนเก่าๆ ไม่ตาย

⊙บ่าวทิมาไขข้อหัวใจถามซามยังอุ่น   
ว่าเป็นหยัง วันคืนเก่าเก่าก่อนกี้ บํตายถิ่มลับสูญ
⊙คำตอบแนวหนึ่งนี่ ย่อนว่ามีคน    
คนมีมา ก่อนกาลเฮานี่
มีแม่พ่อแล้ว ยังมีปู่ย่า
ตายายพ้อม ลึงป้าคู่สู่คน
เฮ็ดให้ภายลุนส่าง แนวดีมีค่า
ไว่รำลึกฮอดท่าน และเมืองบ้านไว่ห่ำเพิง
ดีและฮ่าย โฮมอยู่นำกัน
ในกำแพงคอกคู ผาสาดเฮือนสูงซั่น
ในกะโบมนั่น  ทังกะบวย ต่า กะต่าย
ของอยู่กินเครื่องใซ่  เฮียนเฮ็ดส่างสืบสาน  กันนอ
⊙คำตอบบ่าวทินี่  ตามกำลังคึดอ่าน  ดอกเด
ขอวอนท่านผู่ฮู่  เอ็นดูถ่อนอย่าเคือง
⊙มื่อนี่ลาจากแล้ว ให่ทุกท่านมีสุข
โควิดไกลคลายทุกข์  เฮ็ดหยังกะดีล้น
ผ้อกันใหม่คลิปหน่า  สิหวนมาตอบท่าน
กับคำถามคึดไว่  มาชวนใฟ่คึดสะออน ท่านเอย  ท่านเอ้ย.

บ่าวทิ | 8.03.2564

🌜ติดตามฟังบ่าวทิจ่ายผญานี้ที่



บทเพลง คึดได้ไปเป็น l บ่าวทิ ยางชุมน้อย

ว่าด้วยที่มาของบทเพลง "คึดได้ไปเป็น" •เกิดมาน้อยเท่าใหญ่ ฟังเพลงบอกรักหรือแสดงบุญคุณแม่พ่อ ก็มีแต่เพลงแยก •มีเพลงแม่ อย่าง ค่าน้ำน...