ลมธันวา

•ยามลมธันวาพัดผ่านทางชีวิต
ชวนคิดฮอดความงาม
ของท่งนาหลังข้าวขึ้นเล้า

•กกส้มแบงหมู่นั่น ผลัดใบ
อวดทรวดทรงองค์เอว
ยามบ่มีใบ กะเบิ่งงามสีบาดใด๋บาดหนึ่ง

•คือกับยามที่เฮาอยู่กับใจ เบิ่งใจเจ้าของออก
มันกะเบา บ่ห่วงหาอารมณ์ใด ๆ

•นั่นแค่ ชั่วขณะใบส้มแบงหลุดข่วนก้าน
เคว้ง คว้าง หล่นระกิ่ง กิ่งนั่น นี่
ละลอย ละเรื่อย ไปตามแรงลมพัดพา
แล้วค่อย ๆ ร่อนลงค้างตอเฟียงแถวบ่ไกลต้นแม่นั่น
เดนอ

•ลมธันวายังพัดผ่านมาย้ำเตือนชีวิต
หนาวปีใหม่เดือนสามสิมา
เป็นหนาวนับเข้าที่ห้าสิบเอ็ดแน่แหล่ว

•อารมณ์สิเน่หาในหลายสิ่งยังคง ลากยาวไป
แบบยินยอม ยอมรับ พอใจ รู้ ตื่น แต่บ่วาง

•เหมือนชีวิตยังมีบางก้อนชีวาให้หล่อหลอม
ซอมชูดูแลแปรรูปให้กลายเป็นร่างเรือนรวงคำ
บ่งึดดอกเด หากสิมีคนสมเพชว่า

•"จะแม่นโง่คักนอ สิมากอดคอกันตาย
ในวัฏสงสารอันทุกข์ทรมานส่ำนี่บ้อ..."

--------------------

คำแต้ม by ทางหอม