ถามข่าว

ถามข่าวอุบลบ้าน-วารินฯ น้ำหลั่ง
โฮมหลายนอ
ถามข่าวไทฮิมมูน
ห้วยขะยุงยังนองน้ำ
ทางตาลสุมกะท้นท่วม
ทางตระการหลายหม่องบ่อน
ทางสว่างวีระวงศ์ก็บ่น้อย
ทางพิบูลนั่นมวลน้ำกะอั่งออ

และอีกหลายบ่อนบ้าน
เฮือนซานเป็นอยู่จั่งใด๋หน่อ ในน้ำนั่น
การกินอยากข้าวน้ำพอให้ส่วงหิว ยุนอ
ควมเป็นอยู่นั่นลำบากพอทน ส่ำใด๋
นาสวนวายเสียหาย สิหาหยังผ่อนเพาลงบ้าง
เครื่องมือหากินนั่น เพพังพอซ่อมบ่
สารพันทั้งหนี้ สิมีท้างดอกป่องแปว
อยู่ดอกเดอ พี่น้องเอย

แนวบ่เป็นบ่ฮู้
แนวผู้บ่ประสบภัย
ขมขื่นอุกอั่งใจ ส่ำใด๋บ่มีฮู้
คือจั่งกอข้าว บ่ฮู้ฮ่อมทางเทียว
ปลากะลอยวังเวิน บ่ฮู้ฮากหยั่งลงภายพื้น
ผุข่าซอมสงสารแท้
มีข้าวของ...พอได้ส่อย ตามมีแหลว
แต่ว่าทางอกใจหมู่เจ้า บ่มีหม่องสิส่อยตาง

ได้แต่ถามข่าวเจ้า
ถามไถ่ให้แฮงใจนี่ล่ะเดอ
ถามด้วยควมห่วงใย
ถามส่งกำลังใจ ให้สู่คนให้ยืนได้

ไวไวถ่อน ธาราให้ไหลหลั่ง ไปสา
ให้พ่อแม่พี่น้องฮิมมูนบ้าน
ได้คืนบ้าน ทำกินได้ดั่งเดิม

ฟ้าวเดอ น้ำเอย ฟ้าวไหลไปสาเดอ
ไวไวแนเถาะ น้ำเอย

#ถามข่าวไทอุบล
ทางหอม
๒๓.๙.๒๕๖๒