วันเสาร์ที่ 4 มกราคม พ.ศ. 2563

วันพฤหัสบดีที่ 2 มกราคม พ.ศ. 2563

🍂ส่ำนี่ล่ะน้อ☘



เป็นส่ำที่เคยเป็นดีพอบ่
เป็นไปอีกแนส่ำที่เป็นได้สิดีบ่
คือจั่งหมากไม้หมู่นั่น---

หมากเหม่าบ่ห่อนหวานท่อหมากโมสุกใจแดง
แต่หมากโมสุกกะบ่ห่อนมีส้มมีฝาดได้

หมากลอมคอมสุกบ่ห่อนหวานปานหมากหาด
แต่หมากหาดกะห่นบ่มีพวงมีพวกเขียวก่องมาก่อนได้

หมากยางต้นบ่ห่อนสีสุกส้มงามปานหมากยางเครือ
แต่หมากยางเครือสุกกะบ่ห่อนมีสีม่วงสดปนรสหวานแซบได้

คือบล็อค กับ เพจ บนหน้าจอ
หมากหวดข่าสุกกับหมากหว้าสีชมพูสุก
แม่นหวานฝาดและดำม่วงสิใกล้เคียง
แต่กะบ่ห่อนแทนที่กันได้

เป็นบ่ได้ส่ำเพิ่น
เป็นเพิ่นได้บ่ห่อนเป็น

ถ่ามื้ออื่นเช้า จั่งว่ากันนอ.


ทางหอม คิมหันต์
อา.28.7.2562
(หว่างคึดทวนว่า
จะของเป็นได้ เป็นหยัง ส่ำใด๋
เป็นลาย เป็นดวงด่างได้ ต่างใผ)


วันพุธที่ 1 มกราคม พ.ศ. 2563

ซอมทาง

คำแต้ม แต้มภาพถ่าย


🍂บ่ไปไกล🍃



ไกลกว่าเชือกล่ามควย
แม่นหยังแน
มีกลิ่นข้าวจี่ กะ กาเฟดำบ่

ไกลกว่าหน้าดำกล้า กู้ผักบั่ว
แม่นหยังนอ
มีกลิ่นข้าวนึ่ง กะ ชาใบมอนบ่

ไกลกว่าทางไปวัดของย่า
แม่นหยังล่ะ
มีกลิ่นดอกสะเลเต กะ ลวกผักตำนินบ่

ยังวนเวียน
บ่ไปไสไกลเลยติ๊
วิญญาณเด็กน้อยเลี้ยงควยนาห้วยฮ่อมนั่น.


ทางหอม คิมหันต์
อา.28.7.2562
(หว่างคึดฮ่ำว่า
ใผเป็นใผ
เฮ็ดหยังให้โตเองและแผ่เผื่อใผแน
ใผสิฮู้สิฮ้ายใผเผื่อใผๆกันแท้บ่บ่ะนอ)


วันอังคารที่ 31 ธันวาคม พ.ศ. 2562

🍂บ่ฮู้จัก 🍃




เด็กเลี้ยงควยนาหนองหิ่ง
บ่ฮู้จักหนังสือสารานุกรมเล่มใหญ่
ชื่อปกแข็งเดินทองในห้องหอสมุดหลวง

บักก่อ บักบกโคกป่าหนองยาง
บ่ฮู้จักบักอาโวคาโด
ในป่าปวยบลา-เม็กซิโก

ลางเทื่อ ลางมื้อลางเว็น---
เฮาบ่ฮู้จักหมู่เด็กน้อยในโตตน
และป่าผลไม้ในคีงบาง

---ฮอดบ่ฮู้จัก
ปันยิ้มให้ผู้อยู่ในกระจกเงา
ตรงหน้านี่.


ทางหอม คิมหันต์
ส.27.7.62
(หว่างคึดเห็นต่อบทกวีของอรรณพ วันศรี
ที่โพสต์เมื่อ 25.7.62:20.33 น.-นกไม่เคยรู้---)


🕊ตัวละครหน้าฮ่านกาเฟ🍃


ระดับความทุกข์ยากปากขม
วัดด้วยตัวเลขชุดใด
ใช้เกณฑ์หยังตัดสิน

ค่าตอบแทนความเข้าใจ
รางวัลความสู้ซน
ใผผู้คัดสรรวางมอบ

ลายตัวละครบนใบเขียวนั่น
ระบายคำตอบ
หรือแค่หยอกให้คึดเล่นหัว

ระดับความทุกข์ยากปากขม
เป็นวลีในอกใจดิจิตอล
ของไทอื่นแนบ่

ทางหอม
ส.27.7.2562
(หว่างนั่งแญงฮูปจากฮอยขูดใบเขียว หน้าฮ่านกาเฟข้างรพ.ศรีมหาโพธิ์)


ทางต่างทาง


เตอะตมตามเคย
ยามฝนตกต้องจำนรรจ์
ฝาตีนเปื้อน

เฝอะฝุ่นตามคุ้น
ยามแล้งบรรเลงบ่ลดละ
ฮูดังอั้น

---

บ่คือทางใดๆ
บ่เป็นตามทฤษฎีใผ
บ่เหมือนนโยบายจากซอกห่วงใยไหนๆ

ฝาตีนเปื้อน
ฮูดังอั้น
แต่ปากยังร่ายกถาเวียกงาน
แต่ก้าวยังบ่เมื่อยบ่ล้าหล่อยถอยแฮง

หญ่อนใจฮู้ฮ่อม
หม่องหมายประกายข้าว
เสมอกันในนาบ่แปลกต่าง นั่นนอ
บ่ว่าใหญ่ว่าน้อยยังเป็นข้าวคู่นา ฮั่นเด.

ทางหอม
พฤ. 25.7.62
(หว่างฮู้ข่าวการต่อสู้เพื่อเท่าท่อเทียมธรรม หลายบ่อนบานในเมืองบ้าน)


บทเพลง คึดได้ไปเป็น l บ่าวทิ ยางชุมน้อย

ว่าด้วยที่มาของบทเพลง "คึดได้ไปเป็น" •เกิดมาน้อยเท่าใหญ่ ฟังเพลงบอกรักหรือแสดงบุญคุณแม่พ่อ ก็มีแต่เพลงแยก •มีเพลงแม่ อย่าง ค่าน้ำน...