🍂บ่มะหับมะหาย🍃

คักแท้แหม สูนหลายคัก
ลมออกหูคนบ่แม่นหูหม้อฮวงกะต่า
ควมเห็นใผในเมนต์ใต้โพสต์
มาโพดคักแนแท้

มะส่างกล้าดูถูกบักหว้าว่าบ่หวาน
มะส่างกล้าดูถูกบักเบ็นว่าบ่ฝาด
มะส่างกล้าดูถูกบักส้มมอว่าบ่เป็นตาหย่ำคุยแจ่วพริกผง
มะส่างกล้าดูถูกบักส้มลมว่าบ่แม่นของกิน
---

จั่งใด๋จั่งกล้าว่า
ทางไปนาบ่สู้ทางไปวัด
ทางไปสวนบ่สู้ทางไปมหาวิทยาลัย
ทางไปเลี้ยงงัวควยบ่สู้ทางไปประกวดวรรณกรรมแห่งชาติ

มหัศจรรย์คำเว่าว่า
มโหฬารจินต์ในทรวงในไส้
มะหับมะหายไปในทะเลทรายใครเล่า
ยังสุกใสปานเม็ดน้ำค้างต้องแสงเช้า
มลังเมลืองในทุ่งข้าวสีใบข่าใผกัน


ทางหอม คิมหันต์
พ.7.8.62
🔖หว่างอ่านโพสต์คำกวีของนักประพันธ์ฮ่วมสมัย "วิชัย จันทร์สอน"🏷

🍂ปานบ่เคย🍃

โอม...ของกินดียี่ห้อเด่นดัง
ในร้านซื้อสะดวกจ่าย

ขายสะดวกจริง
เห็นบิลนับร้อยลอยอ่องล่องๆ
ปานเมืองฟ้าประทานมา

โอม...ของกินของใช้หลายรูปทรงตรงใจ
จากรถส่งของฮอดห้อง 

คนส่งสิ่งฮอดมือ
เห็นข้อความเงินออกไหลเลี่ยนๆ
ปานเมืองสวรรค์บันดาลดล

ส่วนอีกฟาก
ใผเข้าตลาดซื้อไข่
ใผเข้าตลาดซื้อปลา
---
จักรวาลตลาดเช้า
เห็นชีวิตสดๆ
ปานบ่เคยมาจักเทื่อ


ทางหอม
พ.7.8.62
🔖หว่างซอมการซื้อของกินอยู่ของคนยุคดิจิตอล🏷

🍂บ่แม่นตอนนั่นติ🍃

เจ็บปวดตอนนั่นไง
ตอนหมู่เฮาปล่อยให้เพื่อนเหล่าอสูรเอไอ
ออกคำสั่งที่ศูนย์ทับสูญให้บรรดาสมุนมันเผาภาษาเสียสิ้น
มนุษย์หยิบมือ
ไล่ไขว่าคว้าถ้อยคำ
ในฝุ่นขี้เถ้าของเสียงและความหมาย
เหล่าพยัญชนะแตกละเอียดเกลื่อนถนนออนไลน์
สระเหลือเศษเสี้ยวธุลีนาโนในแอพโฆษณานิรนาม
หางวรรณยุกต์ศักดิ์สิทธิ์ตัวพิการเลือนหายไปในแพชชั่นของขอทานป.เอก

ทุรนทุรายในลมหายใจเฮือกสุดท้าย
ตอนมัวเมาอำนาจการจิ้มปัดอัศจรรย์นั่นไง
ขณะยักษ์สมุนอสูรเอไอจับนักประพันธ์แชทคนเหลือค้างโคกป่าเหล่าฮ่าง
เขย่ารีดเอาสัญญะชุดสุดท้ายแห่งยุคสิบจุดเก้าเก้า---
มาใส่ลงไปในห้องเครื่องรถยนต์เวอร์ชั่นใช้ไฟฟ้าเสียบปลั๊กรุ่นมโนสำนึก
มือนิ่มนิ้วส่วยงามกดปุ่มสตาร์ทเดินเครื่องยนต์
กดเกียร์ถอยพุ่งทับบดร่างแบบบางของเขาจนแหลกละเอียด
แล้วขับออกไปยังอาณาจักรปราศจากสัญลักษณ์เสียงแลรูปสื่อสารใดๆ


ทางหอม คิมหันต์
4.8.2562
(หว่างอีกเมนต์ใต้บทกวีของกวีหนุ่มดาวดิจิตอลบรรณพิภพ
"อรรณพ วันศรี")

🍂บ่กล้าว่าบ่เคย 🍃

-ภาคหลง-

แน่ล่ะที่รัก
รอยบากตรงโคนต้น
ทำให้บักพร้าวยากมีแนว
พ้าวออกช่อซุมแซงและออกหน่วย---

แน่ล่ะที่รัก
รอยไหม้จากไฟสุมทรงพุ่ม
ทำให้บักม่วงยากมีลูก
พ้าวเบิกฤกษ์ออกดอกและออกหน่วย---


-ภาคอภัย-

เยียวยาบาดแผล
ด้วยแคนเซิลคำตัดสิน
เยี่ยงเด็กป่วยโปลิโอบวกออทิสติก

เยียวยารอยตำหนิ
ด้วยเอนเทอร์ใจอุ่นกลิ่นแกงเห็ดหนาดอกจูมส้มผักติ้ว
ในภาชน์ข้าวงาย ณ โต๊ะอาหารคันแทนาปริ่มน้ำ


ทางหอม คิมหันต์
3.8.2562
(หว่าง ต่อขวัญคำจากลำธารสายหอมมโนทัศน์/
คำกวีบ่มีสัมผัส' กับกวี "อรรณพ วันศรี")

🍂ในบางโมเมนต์ 🍃

ใบไม้นาหนองบก
บอกฮักใบหญ้าคาโคกป่าเห็ดไค
ผ่านประติมากรรมรังนกจาบคา

ข้าฯโอบกอดนกใจ
ในสเตตัสภักดีเด็กเลี้ยงควย
ประดับด้วยแสงเงาผู้หลูโตน
ของกล่องคิดเห็นนานา
แซมลีลาสีสันการแชร์หมู่นั่น

ระหว่างชั่วโมงพักผ่อนของคนอกหัก
ซุมแซงผีเสื้อโพนผักบั่วแนวมากดไลค์
พี่น้องแมงจีนูนป่าหมากคันจ้องมากดฮัก
และญาติๆ ตั๊กแตนท่งมากดยิ้มหัว
ก่อนที่ลำล่องทำนองอุบลลาไลในยูทูปพันล้านวิว
อันมีมวลจีโป่มมากดเสียใจฮ้องไห้ใส่เดือนเพ็ง


ทางหอม
2.8.2562
(หว่างเมนต์ใต้บทกวีของกวีหนุ่มดาวดิจิตอลบรรณพิภพ "อรรณพ วันศรี")

🍂สถานะลมหายใจ🍃

-1-
ยังสภาพดี
บ่มีฮอยหมองเศร้า
คือบักแตงจิงติดตม มีแผลเน่าจากมดเสี้ยนดิน
บ่มีฮอยคึดค้อยลอยต่ำลง
จั่งตาเว็นพวมลับทิวไผ่หอลังฆังไม้ข้างกำแพงวัด
บ่มีขี้ตม ฝุ่นฝ้า---ส่ำรถปิ๊กอัพขับผ่านทางดินทรายผงลงมูนบ้านผักขะ
ยามแก่เฟียงไปกองไว้ปกโพนผัก
เป็นตาอยู่ตาเซาตาเคารพยุเดนี่

-2-
แต่บางหัวใจหมู่นั่น
ยังยื้อรักษาสภาพทรงบ่ทรุดจากพิษฮักฮ่าง
ยังใกล้สูญสิ้นการควบคุม
แต่บ่ทันฮอดยามซ่อมแปงแต่งแก้เสียเคราะห์
กะตาเป็นห่วงยุเดนั่นน่ะ

-3-
ลมหายใจแรงเร้า
แสดงสถานะหัวใจหยาบด้านบ่
ลมหายใจระบายเบ่งบาน
แสดงสถานะหัวใจรื่นรมย์สมหวังไหม
ลมหายใจหดลดขนาด---เบาบางจางวาบวับ---
แสดงสถานะหัวใจสงบราบเรียบไฉนกันเล่า.


ทางหอม
2.8.2562
หว่างเมนต์ใต้บทกวีของศิลปินครูเพลงกวี "โชนศาสตร์ ก้อนทอง"

🍂ข่อยกับเขา🍃

ข่อยเคียนผ้าแพรไส้ปลาไหลสีแหล่สิ่ว
จากหูกต่ำใต้ตะล่างเฮียนฝีมืออีแม่
ในนั่นแม่นห่อข้าวเหนียว
ขี่ควยลงท่ง
ฮ้องเพลงลำ
ขับขานความหมาย
คนอกหักอันม่วนซื่น

เขาสะพายย่ามกระสอบปุ๋ยสีดอกบักเฟืองส้ม
กับหนังสือเรียน กศน. 2 เล่ม
ไว้เบิ่งและหมุนหัวนอนเว็น
เทิงสะแนนไม้ไผ่เหลื่อมมัน
ในเถียงหลังคามุงไพหญ้า
ใต้ฮ่มพร้าวฮ่มกอก
ข้างโพนผักเทียมอีพ่อ
ค้นหาเส้นทางชีวิต
จากความฝัน
ไทฟากท่ง


ทางหอม คิมหันต์
อัง.30.7.2562
(หว่างอ่านโพสต์บทกวีเกี่ยวแก่ข่าวเด็กน้อยกระดูกหลังคดงอ
ของ อรรณพ วันศรี )

🍂บ่เหลือค้าง🍃

ตายแล้วตายเลย

เอาส่ำฉีดยาฆ่าหญ้าหวาย
แล้วไถ ขุดฮาก เก็บกองจูดเผา
บ่ให้เหลือฝุ่น

เอาปานถอนทื้นหญ้าฮังกา
แล้วหอบกองใส่คันแท
ไว้เหยียบย่ำซ้ำตื่ม

เอาจั่งปราบกกสะนูในฮ่องนาตากล้า
แล้วตั้งแต่ยังบ่มีดอกมีหน่วย
คือหมายใจให้ดับแนว

พุ้นแหล่วล่ะควมคึด
ตายสา ตายเสี่ยง ตายเกลี้ยงสา
ตายแล้วกะแล้วดอก

คุณค่าส่ำหญ่าญุง
ไสสิท่อข้าวกอดีมีค่าผ่องทองคำเพิ่น
คุณค่าส่ำเกิดแกมเพิ่นในท่งในนา
ไสสิอ้อนวอนอยู่ต่อได้

ตายแล้วกะแล้วดอกตี๊
หรือใด๋ๆ


🔖ทางหอม 🏷
อัง.30.7.2562
(หว่างอ่านหญ้าในนาท่งข้าวหว่าน---)

🍂บ่นานดอก🍃

ขายข้าวเหนียวข้าวจ้าวซื้อปุ๋ย-ยา-ฮอร์โมนเพิ่น
เสียให้ร้าน-ให้ระบบ-ให้รัฐ---
อีกท่อใด๋

ขายผักบั่วหัวแดงหัวขาวซื้อแนวใช้ไปโรงเรียนให้ลูก
เสียให้ร้าน-ให้ระบบ-ให้รัฐ---
หลายปานใด๋

เสียเหงื่อแลกพืชผล
เสียควมคึดแลกบ่เป็นหนี้
เสียเวลาขอเป็นองคาพยพนำเพิ่น
เสียควมฝันแสนงามวามเท่ซุกญู่ชูค้ำสิ่งใดแนน้อ
เสีย---ไปจนมื้อตายพุ้นรึบ่

หกสิบปีลูกยังเป็นสาวบ่าว
เจ็ดสิบปีหลานยังบ่มาเกิด
แปดสิบปีหลานเกิดเป็นขวัญคีงอุ่น
เก้าสิบปีลูกลาออกจากงาน--- หลานเข้าเรียนฮู้อยู่บ้าน---
ร้อยปีหลานบ่ไปหางานเฮ็ดหม่องอื่น
บอกปู่ว่า

"บ่ดนบ่นานดอกปู่
นาเฮาสวนเฮาผืนสุดท้าย
สิกลายเป็นผืนแผ่นทองคำ"

🔖ทางหอม 🏷
อัง.30.7.2562
(หว่างอ่านข่าวว่า "คนจนบ่ต้องจ่ายภาษี")

หลังคาน้ำ

ท่วมฮอดฝ่าตีน กะไคตี๊
ท่วมฮอดตุ่มค้อง กะเคยมี
ท่วมฮอดบีแข้ง แล้วบ่พี่
ท่วมฮอดขาโอ้ง แล้วต้องหนี
ท่วมฮอดง่ามขา แล้วห่านี่
มาไว้ตายแท้ บ่ทันได้ขงได้ข่าว
ขนของบ่ทัน แล้วอีแม่ญีอีพ่อญี
ท่วมฮอดชั้นสอง อีหลออีหลี
ท่วมฮอดหน้าต่าง มาซ่างเป็น
ท่วมฮอดหลังคา แนมหาบ่เห็น

หลังคาเฮือนชาน โอ๋นออยู่ไส
เห็นแต่หลังคาน้ำ
ฟังแต่เสียงคนฮ้องฮ่ำไห้

ฟากท่งนั่นเบิ่ง
เทียงนาหลังคาไพหญ้าผุ
จมมิดบ่เห็นแล้วสู
แล้วขี้เกียมขี้โก๋มันหลบมันลี้
ไปอยู่กกหว้า กกบก กกส้มแบง กกยาง
ทันอยู่ดอกตี๊

หลังคาเถียงนา โอ๋นออยู่ไส
เห็นแต่หลังคาน้ำ
ฟังแต่เสียงมดเสียงแมงฮ้องฮ่ำไห้

มื้อหนึ่งบ่หมอง
มื้อสองสามสี่พอทน
มื้อห้าหกเจ็ดใจหมองหม่น
มื้อแปดเก้าสิบเหลืออดเหลือทน
มื้อต่อจากนี่
ข้าวในนาถูกน้ำปล้น
ข้าวของทำกินถูกทำลายปี้ป่น

ชีวิตมื้อหน้าหันหาใผเดนอ
สิเห็นใจให้โอกาสคนทุกข์ยาก
คือข้าวในนาเปื่อยตายบ่เหลือซาก

แนมหลังคาน้ำ
ใจสิขาดสิหล่น

น้ำน้ำน้ำน้ำน้ำน้ำน้ำน้ำน้ำน้ำน้ำน้ำ
น้ำน้ำน้ำน้ำน้ำน้ำน้ำคนน้ำน้ำน้ำน้ำ
น้ำน้ำน้ำน้ำคนน้ำน้ำน้ำน้ำน้ำน้ำน้ำ
น้ำน้ำน้ำน้ำน้ำน้ำคนน้ำน้ำน้ำน้ำน้ำ
น้ำน้ำน้ำน้ำน้ำน้ำน้ำน้ำน้ำน้ำน้ำน้ำ

ทางหอม
20.9.2562

ว่าแล้วตั๋ว

คอนกะต่าไป

หิ้วครุถังไป

เคียนแพรไป

บ่ต้องย่านบ่มีแนวใส่...

ต่างทาง

อาจเสงี่ยมงาม

ตามแบบเฉพาะ

ตนแหละตน

เหมือนใครที่ไหนกัน

🍂ส่ำนี่ล่ะน้อ☘

เป็นส่ำที่เคยเป็นดีพอบ่
เป็นไปอีกแนส่ำที่เป็นได้สิดีบ่
คือจั่งหมากไม้หมู่นั่น---

หมากเหม่าบ่ห่อนหวานท่อหมากโมสุกใจแดง
แต่หมากโมสุกกะบ่ห่อนมีส้มมีฝาดได้

หมากลอมคอมสุกบ่ห่อนหวานปานหมากหาด
แต่หมากหาดกะห่นบ่มีพวงมีพวกเขียวก่องมาก่อนได้

หมากยางต้นบ่ห่อนสีสุกส้มงามปานหมากยางเครือ
แต่หมากยางเครือสุกกะบ่ห่อนมีสีม่วงสดปนรสหวานแซบได้

คือบล็อค กับ เพจ บนหน้าจอ
หมากหวดข่าสุกกับหมากหว้าสีชมพูสุก
แม่นหวานฝาดและดำม่วงสิใกล้เคียง
แต่กะบ่ห่อนแทนที่กันได้

เป็นบ่ได้ส่ำเพิ่น
เป็นเพิ่นได้บ่ห่อนเป็น

ถ่ามื้ออื่นเช้า จั่งว่ากันนอ.


ทางหอม คิมหันต์
อา.28.7.2562
(หว่างคึดทวนว่า
จะของเป็นได้ เป็นหยัง ส่ำใด๋
เป็นลาย เป็นดวงด่างได้ ต่างใผ)

ซอมทาง

คำแต้ม แต้มภาพถ่าย

🍂บ่ไปไกล🍃

ไกลกว่าเชือกล่ามควย
แม่นหยังแน
มีกลิ่นข้าวจี่ กะ กาเฟดำบ่

ไกลกว่าหน้าดำกล้า กู้ผักบั่ว
แม่นหยังนอ
มีกลิ่นข้าวนึ่ง กะ ชาใบมอนบ่

ไกลกว่าทางไปวัดของย่า
แม่นหยังล่ะ
มีกลิ่นดอกสะเลเต กะ ลวกผักตำนินบ่

ยังวนเวียน
บ่ไปไสไกลเลยติ๊
วิญญาณเด็กน้อยเลี้ยงควยนาห้วยฮ่อมนั่น.


ทางหอม คิมหันต์
อา.28.7.2562
(หว่างคึดฮ่ำว่า
ใผเป็นใผ
เฮ็ดหยังให้โตเองและแผ่เผื่อใผแน
ใผสิฮู้สิฮ้ายใผเผื่อใผๆกันแท้บ่บ่ะนอ)

🍂บ่ฮู้จัก 🍃

เด็กเลี้ยงควยนาหนองหิ่ง

บ่ฮู้จักหนังสือสารานุกรมเล่มใหญ่

ชื่อปกแข็งเดินทองในห้องหอสมุดหลวง

บักก่อ บักบกโคกป่าหนองยาง

บ่ฮู้จักบักอาโวคาโด

ในป่าปวยบลา-เม็กซิโก

ลางเทื่อ ลางมื้อลางเว็น---

เฮาบ่ฮู้จักหมู่เด็กน้อยในโตตน

และป่าผลไม้ในคีงบาง

---ฮอดบ่ฮู้จัก

ปันยิ้มให้ผู้อยู่ในกระจกเงา

ตรงหน้านี่.

ทางหอม คิมหันต์

ส.27.7.62

(หว่างคึดเห็นต่อบทกวีของอรรณพ วันศรี

ที่โพสต์เมื่อ 25.7.62:20.33 น.-นกไม่เคยรู้---)

🕊ตัวละครหน้าฮ่านกาเฟ🍃

ระดับความทุกข์ยากปากขม
วัดด้วยตัวเลขชุดใด
ใช้เกณฑ์หยังตัดสิน

ค่าตอบแทนความเข้าใจ
รางวัลความสู้ซน
ใผผู้คัดสรรวางมอบ

ลายตัวละครบนใบเขียวนั่น
ระบายคำตอบ
หรือแค่หยอกให้คึดเล่นหัว

ระดับความทุกข์ยากปากขม
เป็นวลีในอกใจดิจิตอล
ของไทอื่นแนบ่

ทางหอม
ส.27.7.2562
(หว่างนั่งแญงฮูปจากฮอยขูดใบเขียว หน้าฮ่านกาเฟข้างรพ.ศรีมหาโพธิ์)

ทางต่างทาง

เตอะตมตามเคย
ยามฝนตกต้องจำนรรจ์
ฝาตีนเปื้อน

เฝอะฝุ่นตามคุ้น
ยามแล้งบรรเลงบ่ลดละ
ฮูดังอั้น

---

บ่คือทางใดๆ
บ่เป็นตามทฤษฎีใผ
บ่เหมือนนโยบายจากซอกห่วงใยไหนๆ

ฝาตีนเปื้อน
ฮูดังอั้น
แต่ปากยังร่ายกถาเวียกงาน
แต่ก้าวยังบ่เมื่อยบ่ล้าหล่อยถอยแฮง

หญ่อนใจฮู้ฮ่อม
หม่องหมายประกายข้าว
เสมอกันในนาบ่แปลกต่าง นั่นนอ
บ่ว่าใหญ่ว่าน้อยยังเป็นข้าวคู่นา ฮั่นเด.

ทางหอม
พฤ. 25.7.62
(หว่างฮู้ข่าวการต่อสู้เพื่อเท่าท่อเทียมธรรม หลายบ่อนบานในเมืองบ้าน)

ทางกาน

กานกกไม้ให้มีหมากมีหน่วย
กานเอิ๊กใจให้มีอดมีทน
กานควมคึดให้มีสืบส่องสอบสวน

กานฮักให้ห่วนให้หอม
การซังให้ฮู้ห่วงฮู้ฮ่ำฮอนหวนคะนิง

กานกานไว้
ในแสนล้านสิ่ง
คันบ่กาน บ่เกิดบ่ก้าวบ่ไขบ่แก้
การสิบ่ได้ กาลแก้วก่องกานต์
การจั่งสิได้ กาลแก้วก่องตระการ.

ทางหอม
24.7.62
หว่างพบผ้อคำ "อย่างเป็นทางการ"

ฮ่มซ่น | ร่มเงาอาศัย

ยามฝนแล้ง
เลือกเพิงพุ่มไม้ใดกัน
ซ่นฮ่ม

ฮ่มส้มแบง ฮ่มขะยอม
ฮ่มหว้าข้าวก่ำ ฮ่มหว้าสีชมพู
ฮ่มไฮนา ฮ่มมันปา ฮ่มส้มมั่ง ฮ่มบก
ฮ่มพ้าว ฮ่มบักม่วง ฮ่มผักขี้เหล็ก ฮ่มหมากมี่
ฮ่บักทันน้อยโนนเถียง ฮ่มกล้วยกอข้างโพน ฮ่มกะเดา
ฮ่มกะโดน ฮ่มสวนมอน ฮ่มติ้ว ฮ่มกอก ฮ่มก่อ
...

สารพันฮ่มกลางนา กลางฮั้วไฮ่สวน
สารพัดฮ่มฮิมทางเมือนาดินทราย ชายป่า โคกผีป่าหลอก

ยามแล้ง
อึดหลายขี้หล้ายแท้นอสายฝน

เลือกฮ่มงานบ่มีหนี้ตื่ม
เลือกฮ่มค่ำคืนบ่มีไข้มีหนาว
เลือกฮ่มเช้าใหม่บ่มีข่าวเศร้าโศกสูญเสีย
จั่งซั่นบ๊อ

เลือกเพิงพุ่มไม้ใดกัน
ยามแล้งแห้งฮ้าย
ไว้ซ่นฮ่ม
ไว้ซ่นฮ่ม


♡ทางหอม○
อา.21.7.2562